СЕ ќе оценува за перењето на пари

22.03.2007 Експерти од Советот на Европа в понеделник ќе дојдат во Македонија за да проверат какви мерки преземаат институциите за да го спречат перењето пари. Уште од сега се најавува дека државата ќе потфрли кај контролата на казината и спроведувањето на законите во практика.
Под лупа на Комитетот на експерти ќе бидат брокерски куќи, казина, менувачници, банки, адвокатската и нотарската комора, судови, Јавното обвинителство. Ќе се цени работата и на Дирекцијата за спречување на перење пари, Народната банка, Царинската управа, Управата за јавни приходи, антикорупциската комисија и на неколку министерства.
– Ќе се оценува ефикасноста на целиот систем, преку механизмите што ги има државата за контрола против перење пари и финансирање тероризам. Извештајот на експертите ќе биде достапен за сите земји членки на Советот на Европа. Ќе има и препораки како да се надминат слабостите, со кои државата ќе мора да се справи по секоја цена – велат во Дирекцијата за спречување на перење пари.

 Во делегацијата се експерти од Бугарија, Латвија, Унгарија, Грузија и Линхештајн. Преку институциите што ќе ги посетат тие ќе донесат заклучок за функционирањето на правниот и политичкиот систем и на органите должни да ги спроведуваат законите.
– Се движиме напред, но многу бавно. Најголем напредок има кај банките, кои навистина се обидуваат да го спречат перењето пари оти тоа се одразува и на нивниот углед. Покрај казината, слаба точка е и Јавното обвинителство и соработката меѓу институциите – велат во Дирекцијата.
Вакви евалуации биле направени и во 1998 година и во 2002 година. Извештајот за 1998 година бил целосно негативен. Во 2002 година биле забележани првични резултати, недоволни да се спречи перењето пари според строгите европски критериуми.
Се очекува извештајот на експертите да биде готов до крајот на годината.

Извор: Време