Стечајни постапки за распад, а не за раст

29.05.2007 Стечајните постапки во Македонија траат предолго, се обесштетуваат и фиктивни доверители, со години се раскрчмува имотот, многу фабрики сосема се обезвреднија. Ограбени останаа фирмите од кои печалеа само поединци. Има низа примери на компании што отишле во стечај и покрај тоа што немало потреба за тоа. Бесконечно долги и тешки за работниците, македонските стечаи во просек траат по нешто помалку од пет години. Скопските „Газела“ и „Центро“, но и уште неколку стотици фирми, се сведоци на стечајни постапки долги по една деценија.

Со новиот Закон за стечај стечајните постапки треба да завршат во рок од шест месеци, а не како досега, тие да се водат повеќе години. Стечајните управници ќе треба да имаат лиценца за работа што ќе се обновува на секои две години. Управникот ќе треба да има и осигурување, а целиот негов имот ќе биде гаранција дека ќе работи чесно. Управниците мора да ја почитуваат законската регулатива, односно ако има план за реорганизација, стечајната постапка да ја завршат за 207 дена, а при ликвидација за 175 дена.  

Министерката за економија Вера Рафајловска, на доделувањето на потврдите за посетување курсеви на 50 стечајни управници им порача да работат поефикасно.
– Ќе мора да се стегнете бидејќи предолго ги водите стечајните постапки. Имаме сознанија и факти дека одолжувате. Работниците не се задоволни од вас – рече Рафајловска.
Стечајните управители вината за постапките кои траат и по 10 години ја лоцираат во државните институции и во законските ограничувања. Тие велат дека работата ја кочат судовите и катастарот. Најголемиот проблем со кој се соочуваат стечајните управници е утврдувањето на правото на сопственост.

Досега, единствено бившиот стечаен управник на повеќе фирми во Македонија Владислав Тамбурковски доби ефективна затворска казна. Тамбурковски во последните десетина години беше стечаен управник во повеќе пропаднати македонски претпријатија. Беше ангажиран за стечајот на Експорт-импорт банка, а ги водеше контроверзните стечаи во Газела, во ФАС, во велешката топилница.

Извор : Време