Договорот за продажба на ОКТА може да се поништи

17.08.2007  Договорот за купопродажба на рафинеријата ОКТА може да се поништи, ако се утврди дека при негово склучување имало корупција и злоупотреба на службената положба.

Ова го тврди адвокатот Драган Малиновски, поранешен претседател на Државната комисија за спречување на корупцијата, во изјава за денешен скопски „Дневник“, додавајќи дека со тоа може да се одбегне плаќање на отштета.

Државната комисија за антикорупција во поранешниот состав, во 2003 година, поднесе иницијатива за кривичен прогон, откако оцени дека договорот за купопродажба на ОКТА е „коруптивен акт“, изјави Малиновски.
Немало од никаде одговор на иницијативата, но според адвокатот договорот за купопродажба на ОКТА може и денес да се поништи, поради злоупотреба и корупција при негово склучување.

Дополнително, Македонија може да поднесе тужба против ОКТА за суспендирање на меѓународни еколошки стандарди, што предизвикува сериозни последици по здравјето на луѓето, вели адвокатот Малиновски.
Тој, категорично ја отфрла можноста за давање дополнителни погодности на „Хеленик петролеум“ за да се одбегне плаќањето на отштета.
Арбитражниот суд во Париз по тужба на грчката компанија „Хеленик петролеум“ пресуди Македонија да плати 25 милиони долари отштета. Според неофицијални извори износот е двојно поголем, во што не се пресметани каматите.

Извор: Макфакс