Врховен судија лежи во затвор за мито, виш обвинител е под исрага и суспензија за злоупотреба и малтретирање на вработени, судир на интереси кај членовите на Судски и Обвинителски совет. И покрај тоа што судството пука по сите шафови и Европската унија како и сите домашни институции и организации постојано критикуваат за состојбата, тоа не допира до судиите и обвинителите.
Спас од состојбата се радикални промени. И тоа итни законски измени, разрешувања на судии и обвинители без интегритет и воведување на силни контролни механизми, предлага претседателот на Транспаренси Интернешнл, Благоја Пандовски.
Покрај нискиот морал и кредибилитет на судиите и обвинителите кои според сите информациите што излегоа во јавноста работат за лични, партиски и семејни интереси, судството е во очајна состојба бидејќи кубури и со кадар, појаснува Пандовски. Новите 130 кандидати што претседателката на Академијата за судии и обвинители Наташа Дамјановска Габер сакаше да ги протне за време на избори направија уште поголема дупка во дефицитот од судии и обвинители. Системот е каша попара, а тоа е забележано и во последниот извештај на Европската комисија, коментира претседателот на Транспаренси Интернешнл.
Корупција, непотизам, всадени семејни стебла и блиски релации со политички врвови се главните карактеристики на судиите и обвинителиве изминативе години за коишто медиумите известуваа.
Премиерот коментираше дека борбата за спас на судството ќе биде долга и тешка поради жилавата инсталација на СДСМ и ДУИ во судските редови. Сепак, тој уверува дека победата ќе биде извојувана.
Европската унија, пак, спас бара во реформи и имплементација на Извештајот на Оценската мисија што влезе во Судски совет по неколкумесечното скандалозно однесување на членовите. Засега содржината на Извештајот не ѝ е позната на јавноста.
