На 21 мај 2025 година во хотел Солун се одржа работилница за можностите, користењето и пречките за користење на податоците од Регистарот на вистински сопственици во земјава во борбата против корупцијата организирана од страна на Центарот за граѓански комуникации (ЦГК). На оваа работилница беше претставена „Анализата на користењето на податоците за вистинските сопственици во борбата против корупцијата во Северна Македонија“ подготвена од страна на организацијата.
На оваа работилница учество зема и претставникот на ТИ-Македонија, Марија Сунчевска и имаше можност да ги претстави наодите од подготвениот извештај: „Оцена за регулативата за политички интегритет во Северна Македонија“, подготвен во рамките на проектот: „Следење на интегритетот во Западен Балкан и Турција: граѓански организации во борбата против корупцијата со податоци за политичкиот интегритет. На оваа работилница беа изнесени наодите за отвореноста на податоците во делот на изјавите за имотна состојба, политички партии и доделување на јавни набавки и концесии и како овие податоци може да се користат за зајакнување на политичкиот интегритет.
На работилницата присуствуваа членови на граѓанскиот сектор и беа разменети искуства како да се користат отворените податоци, што треба да се промени во законската регулатива и кои технички решенија треба да се дополнат за да се овозможи користење на различни отворени податоци за детектирање на ризици од корупција. Беше договорена можност за соработка за идни заеднички акции како би се зголемил притисокот врз политичките актери за јакнење на личниот и професионалниот интегритет.
