ДЗР утврдил расфрлање со парите на граѓаните

04.05.2007 Најмалку 75 милиони евра ненаменски и спротивно на законите потрошиле во текот на 2004 и 2005 година Собранието, повеќе јавни претпријатија, здравствени центри, општини и други буџетски корисници, утврдиле ревизорите во Државниот завод за ревизија по контролите извршени во минатата година. Парите на граѓаните без посебни критериуми се делеле за исплата на повисоки плати од пропишаните, за надоместоци врз основа на договор на дело, хранарина и на работи што воопшто не биле планирани во рамките на внатрешните буџети на институциите.

Само во 2005 година, ненаменски биле потрошени околу 72 милиони евра. Во 40 ревизорски извештаи било утврдено дека спротивно на законот за извршени услуги по договори на дело биле потрошени повеќе од 2 милиони евра. Во истите извештаи се покажало дека безмалку 200.000 евра биле исплатени без воопшто да се склучат договори или пак над договорениот лимит. Контролите покажале дека истата година околу 1,4 милиони евра биле потрошени за неоснована исплата на плати и надоместоци. Од нив, само Собранието незаконски исплатило повеќе од 100.00 евра на пратеници што подолг период не присуствувале на работата во парламентот и дури околу 400.000 евра за надоместок за вршење на функцијата пратеник иако овој надоместок бил укинат во јуни 2005 година. Субјектите што ги контролирале во ДЗР, преклани потрошиле повеќе од 57 милиони евра кои не биле предвидени во нивните буџети. Само Фондот за здравствено осигурување потрошил околу 50 милиони евра. 

 Ревизиите за работата на Градската библиотека „Браќа Миладиновци”, „Медицинскиот центар Тетово”, јавното претпријатие „Комунална хигиена”, „Водовод и канализација” и струшкиот „Фонд за локални патишта и улици” покажала дека овие субјекти спротивно на законот во текот на 2004 година за исплата на услуги по договор на дело потрошиле повеќе од 200.000 евра. Слична сума, или околу 188.000 евра, биле потрошени за незаконска исплата на плати, надоместоци и хранарина на советници, градоначалници и лица на службен пат во повеќе единици на локалната самоуправа. Во вкупно 42 ревизии на финансиските извештаи за 2004 година, ревизорите утврдиле дека без законска основа, намена и веродостојна документација биле потрошени безмалку 200.000 евра.
„Време” вчера пишуваше дека загрижувачки осум милиони евра штета биле предизвикани со неспроведување на Законот за јавни набавки во повеќе претпријатија, министерства и други субјекти чија работа ја контролирале ревизорите во Државниот завод за ревизија во текот на 2004 и 2005 година.
Во годишниот извештај на ДЗР пишува дека иако до МВР биле доставени 16 ревизорски извештаи за 12 субјекти за кои овластениот ревизор утврдил дека има основано сомневање за сторен прекршок или кривично дело од Министерството немало никаков повратен одговор дали се преземени мерки по овие извештаи. Во МВР велат дека сериозно и редовно ги разгледуваат извештаите на ДЗР. Сепак, кога се работи за преземање мерки во Министерството чекаат Јавното обвинителство да потегне истрага и тогаш се обврзани да се вклучат во евентуалните истраги со собирање докази. Дека работата на ревизорите често останува без епилог се гледа и од информацијата од 2002 до 2006 година кога до Јавното обвинителство биле поднесени 177 извештаи. За дури 35 отсто од поднесените извештаи, во Јавното обвинителство биле донесени одлуки според кои не е сторено кривично дело што се гони по службена должност. Обвинителите толкуваат дека проблемот не е во недостиг од волја или капацитет за соработка, туку дека проблем се јавува бидејќи ДЗР прави сметководствени извештаи, кои не секогаш може да се искористат за отворање постапка.

Извор: Време