Младите ширум светот несомнено имаат моќ да помогнат во формирањето на поправеден свет. Многу млади луѓе се борат против корупцијата и прават голема разлика во општеството. И ние ве поддржуваме во ова.
За оние кои се заинтересирани за справување со корупцијата, но не знаат од каде да почнат, еве 15 одлични идеи од пакетот антикорупциски алатки за млади на Транспаренси Интернешнл.
1. Следете ги парите
Владите располагаат со огромни суми јавни пари за трошење и тоа може да претставува сериозен ризик за корупција. Со следење на државните трошоци, можете да помогнете да се расветли како се трошат средствата од даноците во вашата земја и да се разоткријат било какви злоупотреби.
2. Пребројте ги набавките
Училиштата добиваат многу материјали од владите, како учебници, лабораториска опрема или други материјали потребни во училиштата. Не е некоја наука да се следи ова. Потребна е само посветеност и транспарентност. Побарајте да видите колку Бунсен горилници би требало да има во биолошките лаборатории, и доколку бројките не се поклопат – прашајте што се случило.
3. Соберете граѓански пријави
Повеќето луѓе имаат одредено мислење за нивната влада или за услугите што таа ги обезбедува, но колку често одвојуваат време да ги запишат своите ставови? Можете да помогнете со собирање картички за граѓански пријави кои обезбедуваат повратни информации за јавните услуги од луѓето што ги користат.
Поединечна картичка можеби не изгледа значајна сама по себе, но збирката од стотици или илјадници картички може да генерира нови перспективи за владините перформанси – кои потоа може да се споделат со медиумите и да бидат искористени од страна на јавноста за да се направат промени.
4. Развијте технолошки решенија
Доколку имате познавање од технологија, можете да им помогнете на заедниците да документираат случаи на корупција преку развивање платформи за известување, на веб или преку мобилни апликации. Социјалните медиуми, особено, се ефективен начин за справување со корупцијата во денешно време. Платформата платив поткуп – е добар пример за тоа.
5. Цртајте стрипови и цртани филмови
Стриповите се моќен начин за подигање на свеста за антикорупција. Преку комбинација на слики и текст, стриповите исто така можат да помогнат да се поттикне дебата – и тие се лесни за креирање. Сè што ви треба е пенкало и хартија.
6. Користете театар и драма
Можете да бидете креативни, со тоа што ќе ја презентирате вашата антикорупциска акција на сцената. Преку музиката, драмата, поезијата или танцот може да им се покаже на граѓаните како да се борат против негативните општествени сили – како што е корупцијата – како и да дадат идеи за тоа како да ја подобрите сопствената заедница.
7. Играјте игри на табла
Игрите се вреден и забавен облик на образование – дури и за сериозни теми како што е корупцијата. Тие развиваат знаења, ставови и вредности и можат да бидат високо ефективни во поттикнување на тимска работа и колективна акција.
8. Подигнете ја свеста преку спортот
Кој е вашиот омилен спорт? Од трчање против корупцијата до постигнување цел за транспарентност, можете да ја подигнете антикорупциската свест на вашата заедница преку било кој спорт.
9. Придружете се на младинска група
Младински групи постојат на локално и национално ниво, но имаат исти ставови кога е во прашање корупцијата. Различни групи имаат различни цели, но имаат две заеднички работи: подготвеност отворено да зборуваат за нивното спротивставување на корупцијата и да ја подигнат свеста за нејзините негативни ефекти врз општеството. Овие групи може да се формираат со цел учество на еднократен настан или за подолготрајни кампањи, на теми како на пример, запирање на поткупот за оценки во училиштата.
10. Учете во кампови за интегритет
Борбата против корупцијата не мора да биде сериозна работа. Преку камповите за интегритет можете да ги соберете пријателите и врсниците и заедно да се справувате со корупцијата. Информирајте се за нашето годишно училиште за транспарентност.
11. Плаќајте „нула“ мито
Банкнотата „нулта валута“ е визуелно помагало што ги охрабрува луѓето да кажат „не“ на корумпираните службеници кои бараат мито и да разоткријат каде и кога се бара мито. Концептот потекнува од Индија каде што бил познат како движење „нулта рупија“ и се покажа како одлична тактика во борбата против корупцијата.
Еве како функционира: кога ќе ви биде побаран поткуп, вие „плаќате“ со банкнота што наликува на вистинска, но всушност се лажни книжни пари што вклучуваат антикорупциски пораки.
12. Протестирајте
Протестните настани се начин граѓаните и групите да се соберат јавно за да покажат голема поддршка или противење на одредено прашање. Протестите, маршовите, демонстрациите и митинзите можат да бидат моќна алатка за активистите во борбата против корупцијата.
13. Креирајте петиции
Петицијата претставува збирка на потписи од луѓе кои ја поддржуваат вашата кауза. Таа петиција потоа им се презентира на носителите на одлуки – како владини или образовни службеници – кои имаат моќ да ја создадат промената што ја сакате. Добар пример за ова е Транспаренси Интернешнл.
14. Побарајте изборни ветувања
Политичарите можеби се кандидираат за функција – но не треба да можат да се кријат. За време на предизборниот период, кандидатите се во центарот на вниманието и ова е период каде може да се повикаат на одговорност за нивната кампања и изборните ветувања.
Можете да побарате од вашите локални кандидати да потпишат ветување против корупцијата или да се согласат да преземат конкретни чекори за да се запре корупцијата. Тие можат, на пример, да се обврзат дека нема да купуваат или продаваат гласови за време на изборите, што е многу честа форма на корупција.
15. Набљудување на изборите преку Crowdsource
Твитнете. Напишете. Пратете e-mail. Од пристап преку вашиот мобилен телефон, па до сурфање на интернет преку вашиот компјутер, никогаш не било полесно или побрзо да се следат изборите во реално време. Преку онлајн платформата Crowdsource со само некоку кликови можете да го известите светот за нерегуларности при гласањето во вашата земја. Некои од информациите може дури и да се исцртаат на интерактивна мапа на интернет, овозможувајќи ви и на вас исто така да видите што известуваат другите во вашата заедница.
Се надеваме дека овие 15 предлози ќе ви бидат корисни! Доколку сакате конкретни детали за тоа како да направите некоја од овие идеи реалност, преземете го нашиот пакет за антикорупциски алатки за млади.
Доколку имате повеќе предлози кои не се на оваа листа, би сакале да ги слушнеме!
