МВР уапсило најмалку 26 полицајци и 9 цариници

 23.02.2007 Најмалку 26 полицајци, 9 цариници и тројца угостителски работници се уапсени во акцијата на македонската полиција спроведена на 4 гранични премини денеска.

Контролирани биле граничните премини Богородица, Меџитлија, Деве баир и Табановце, а акцијата се уште трае.
           
Според истрагата, на ГП Богородица се приведени 13 полицајци, на Меџитлија шест, на Деве баир седум полицајци и шест цариници, додека на ГП Табановце биле приведени тројца полициски службеници.
           
Уапсените биле следени со посебна опрема подолго време, при што било утврдено дека ја злоупотребиле службената должност и земале мито.
 

 Од МВР на прес конференцијата соопштија дека овие податоци се однесуваат само до 13 часот и не ја исклучуваат можноста бројката на уапсените да биде уште поголема.
           
Во текот на акцијата, во која учествувале 400 полицајци, над сите уапсени лица е извршен личен претрес, контролирани се службените простории во кои работеле, како и нивните домови и автомобили.
           
Откако ќе се докомплетира целата документација, уапсените ќе бидат изведени пред истражен судија.
           
Од полицијата додаваат дека немаат информација за евентуална поврзаност на уапсените, односно засега нема сознанија дека тие работеле координирано. При апсењето дел од осомничените биле приведени од своите работни места.
           
Ова досега е најголема акција на уапсени полициски и царински службеници спроведена од МВР.
           
Претходно извор од МВР за Макфакс неофицијално тврдеше дека биле уапсени најмалку 33 цариници и 13 полицајци.

Извор: Макфакс