Претставник од Транспаренси Интернешнл-Македонија Викторија Милеска-Цветаноска учествуваше на работилницата со повеќе засегнати страни за имплементација на Конвенцијата на ОН против корупција (UNCAC) во Југоисточна Европа, која се одржа од 8 до 10 април 2025 година во Врдник, Србија.
Работилницата имаше за цел да го зајакне разбирањето на учесниците за Конвенцијата на Обединетите нации против корупција (UNCAC), нејзиниот Механизам за преглед на имплементацијата, како и пошироките врски помеѓу корупцијата и организираниот криминал, вклучително и важноста на Конвенцијата на Обединетите нации против транснационален организиран криминал (UNTOC). Работилницата обезбеди платформа за конструктивен дијалог меѓу претставниците на граѓанското општество и владините институции, поттикнувајќи соработка и размена на знаење за предизвиците, потребите и успесите во превенцијата на криминалот во регионот.
Работилницата беше организирана во соработка со Канцеларијата на ОН за дрога и криминал (UNODC), Регионалната иницијатива за борба против корупцијата (RAI) и Коалицијата за UNCAC, како дел од програмата „Југоисточна Европа заедно против корупција (SEE-TAC) II“, финансирана од Австриската агенција за развој.
