Вести

19.04.2007 Дали замислата на реформите во судството е правдата да им стане недостапна на граѓаните, тие да прават непотребни трошоци и да мора да патуваат и по стотина километри за да дојдат до судовите? Дали треба дополнително да ги оптоваруваме оние судови кои и без тоа се многу неажурни, а другите кои се квалитетни, ефикасни и свртени кон Европа да ги претвораме во селски судови? Овие дилеми јавно ги поставија првите луѓе на основните судови во Кавадарци, Гевгелија, Кичево и Крива Паланка, кои се иницијатори на законските измени на враќање на проширената надлежност на овие судови. Коментарот на Министерството за правда беше дека овој проект е направен за време на претходната влада, но се' уште е рано да се прават корекции на Законот за судови, бидејќи од имплементацијата се поминати едвај три месеци.

Надлежноста на судовите предвидена со новиот Закон за судовите, нивното работење и подготовка на извештаи, како и менаџирањето, транспарентноста, ефикасноста и ажурноста на судовите, беа темите на вчерашната тркалезна маса организирана од Фондацијата Институт отворено општество – Македонија. Тригодишниот проект, како што истакна Владимир Милчин од ФИООМ, спроведува анализа на потенцијалот за добро владеење во економијата, локалната самоуправа, образованието, социјалните прашања, мониторингот на менаџментот на јавните пари.  

12.04.2007 Предлог Закон за спречување на судир на интереси при вршење на службената должност донесе Владата на својата последна седница одржана синоќа.

Ова на денешната прес конференција го соопшти владиниот портпарол Ивица Боцевски, додавајќи дека надлежен орган за спроведување на овој Закон би била Државната комисија за спречување на корупцијата, која ќе превзема и соодветни мерки.

Проширена е листата на блиски лица, кои се дефинираат со новиот Закон, како лица со кои вработениот не смее да има иста интересна сфера. Во неа се опфатени сите крвни роднини до четврто колено, сватови до второ колено, како и лице со кое се живее во вонбрачна заедница.

Износот на подароци кои смее да ги прими вработено лице е ограничен на 50 евра во службена противвредност, при што забрането е да се примаат книжени пари, хартии од вредност, како и златни кованици, накит и слично.

12.04.2007 Вкупно 44 години казна затвор пресуди денеска Судскиот совет од Основниот суд Скопје 2 со кој претседаваше судијката Лилјана Ивановска-Шопова за 21 обвинети за случајот „Бачило“.

Највисока казна затвор од 14 години доби првообвинетиот, нотарот Никола Стојменовиќ, додека овчарот Иснифарис Џемаили е осуден на казна затвор во траење од 4 години и 6 месеци.

Тригодишна затворска казна им е изречена на адвокатката Ленче Димчевска, пензионерот Ордан Милановски, поранешениот заменик министер за економија Саша Андоновски, поранешната раководителка во Катастарот Емилија Алексовска и нотарите Гордана Ракочевиќ и Михаил Ќосев.

12.04.2007 Седум години без пресуда во случајот на прислушуваните новинари против државата е најматен настан во март 2007, во однос на корупцијата во Македонија и борбата против неа.

Ова го покажаа резултатите од редовната месечна анкета „Барометар на корупцијата“, што ја спроведуваат невладината организација „Нулта корупција“ и Независната новинска агенција Макфакс, а во која гласаат уредници на национални медиуми во Македонија.

За истиот месец, како најпозитивен настан во борбата против корупцијата, е оценето исклучително големото пријавување на екстра приходи за даночење во Управата за јавни приходи, каде до последниот рок, 15 март, над 15 илјади граѓани доставиле годишна даночна пријава.

Случајот „Седум години без пресуда за прислушуваните новинари“ беше понуден за гласање во рубриката „матно“, зашто на почетокот на месецот се навршија точно седум години од тужбата и судскиот процес што го поведоа 17 прислушувани новинари, а надлежниот суд во Скопје, се уште не донел ниту една судска одлука за овој случај. 

10.04.2007 Банкарите заедно со невладината организација „Нулта корупција – транспарентност“ денеска расправаат за корупцијата со цел да идентификуваат формите и начинот на справување со облиците на корупција. Работилницата се одржува во рамки на Проектот „Подобрување на корпоративниот менаџмент за 0 толеранција на корупцијата“ од кој треба да произлезе унифициран или пак кодекс на однесување за секоја област пооделно.

Според Слаѓана Тасева од „Нулта корупција – транспарентност“ иако во банкарскиот сектор постојат најголем број инструменти за обезбедување корпоративно управување и има етички кодекси сепак треба тие подлабоко да се утврдат.

04.04.2007 Промена на свеста кај граѓаните и воведување на построги закони се клучни во борбата против корупцијата.

Ова се заклучоците од денешната тркалезна маса, што ја организираше „Нулта корупција“, на тема „Соработката меѓу политичкиот и граѓанскиот сектор“.

Организаторите на тркалезната маса, особено се задржаа на средствата што политичките партии ги потрошија за време на минатогодишната кампања за парламентарните избори, при што беа објавени нови податоци, кои не соодветствуваа со оние што партиите претходно ги пријавија.

Се работи за податоци собрани во десет градови, според кои парите што ги потрошиле најголемите македонски политички партии, се разликуваат од претходно пријавените суми, а разликите се дури и до два милиона евра.

Ваквата појава беше поврзана со целокупната корумпираност во државата, што според учесниците многу често се поврзува со политиката.
 

30.03.2007 Финансирањето на Судскиот совет и на судството, воопшто, мора да се „одлепи“ од другите две власти ако сакаме граѓаните да стекнат доверба дека тие се навистина независни и самостојни, сметаат членовите на Советот за судски реформи.

– Судскиот совет е орган од исклучителна важност и со големи овластувања, но мора да ја стекне довербата на граѓаните како независен и самостоен. Министерството за правда треба да размисли за неговото финансиско осамостојување – рече народниот правобранител Иџет Мемети.

Според Законот за судскиот буџет, судовите даваат свои процени на финансиските потреби, но Владата одредува колку пари ќе се префрлат од државниот во судскиот буџет.

 – Овој закон е надминат и мора да се смени. Во спротивно, има зависност. Нерамноправноста помеѓу судството и другите две власти е јасна. Тоа се гледа и во неоправданото одолжување на изборот на другите пет члена на Советот од Собранието Три месеци бараме согласност за вработување државни советници. Извршната и законодавната власт мислат дека реформите треба да ги спроведуваат само судиите и Министерството за правда – рече претседателот на Судскиот совет, Бекир Исени.

Министерот за правда Михајло Маневски рече дека реформите во судството ги дале првичните резултати.

23.03.2007 Стотици милиони долари со сомнително потекло како директни странски инвестиции вложиле Кипар, Холандските Антили, Британските Девствени Острови, Сент Винсент и Гренадини и повеќе карипски острови-држави во изминатава декада во Македонија. Само од 1997 година досега од егзотичните држави познати по либералната даночна власт и никаква контрола за потеклото на капиталот што се вложува во тамошните банки во земјава влегле безмалку 160 милиони долари. Се купувале акции во постојни компании, се инвестирале пари во услужната дејност, во недвижнини и помала стапка во производствени капацитети.

Според официјалните податоци на Народна банка, Кипар со околу 194 милиони долари или 9 отсто од вкупните инвестиции во земјава, по Унгарија, Грција и Холандија, на крајот од 2005 година бил четврти најголем странски инвеститор во Македонија. Само во 1998 година, Кипар во земјава вложил 61,5 милиони долари. Податоците покажуваат дека поголем дел од овие пари биле инвестирани во услужни дејности, во недвижен имот, во трговија и во прехранбената и хемиската индустрија. Во периодот од 1997 година до 2006 година од Британски Девствени Острови влегле околу 25 милиони долари директни странски инвестиции, а од Сент Винсент и Гренадини безмалку 20 милиони долари. Само во 2004 година од Холандските Антили во Македонија биле инвестирани повеќе од 10 милиони долари. На листата на егзотични странски вложувачи се и Кајманските Острови со околу 2,5 милиони долари, Панама со околу 2 милиони долари и европскиот Лихтенштајн со безмалку 10 милиони долари. Помали суми се вложувани и од Бермудите, Бахамските Острови, Сан Марино и Девствените Острови. 
 

22.03.2007 Експерти од Советот на Европа в понеделник ќе дојдат во Македонија за да проверат какви мерки преземаат институциите за да го спречат перењето пари. Уште од сега се најавува дека државата ќе потфрли кај контролата на казината и спроведувањето на законите во практика.
Под лупа на Комитетот на експерти ќе бидат брокерски куќи, казина, менувачници, банки, адвокатската и нотарската комора, судови, Јавното обвинителство. Ќе се цени работата и на Дирекцијата за спречување на перење пари, Народната банка, Царинската управа, Управата за јавни приходи, антикорупциската комисија и на неколку министерства.
– Ќе се оценува ефикасноста на целиот систем, преку механизмите што ги има државата за контрола против перење пари и финансирање тероризам. Извештајот на експертите ќе биде достапен за сите земји членки на Советот на Европа. Ќе има и препораки како да се надминат слабостите, со кои државата ќе мора да се справи по секоја цена – велат во Дирекцијата за спречување на перење пари.

19.03.2007 Каква вода пиеме? Колкави се платите на функционерите и на државните службеници? Што содржи сопственото болничко досие? На овие и многу други прашања граѓаните можат да побараат одговор од институциите. Во изминативе шест месеци од функционирањето на Законот за слободен пристап до информации, 513 граѓани поднеле барање за добивање информации од јавен карактер. Граѓаните своето право да бараат информации од јавен карактер од институциите и воопшто од имателите на информации го стекнаа на 1 септември 2006 година, кога почна со имплементација Законот за слободен пристап до информации од јавен карактер. Големо интересирање се покажува за информациите од Министерството за труд и социјална политика, од МВР, од Управата за јавни приходи на град Скопје,како и од А.Д. „Топлификација“. Сепак, најбарани информации се оние кои се однесуваат на финансиското работење на институциите и на тендерските распределби.