Вести

14.11.2007 Помилувањето на Александар Верушевски од страна на претседателот Бранко Црвенковски е најматен, а спречување на продажбата на ТЕЦ Неготино е најбистар настан во октомври во Македонија.

            Ова го решија главните уредници на 17 највлијателни печатени и електронски медиуми во Македонија, во анкетата „Бистро-Матно“ на независната новинска агенција Макфакс и невладината организација Транспарентност–Нулта корупција.

13.11.2007 Македонија е земја со среден безбедносен и политички ризик за странските инвестиции.

Ова го покажа студијата „Risk map 2008“ на консултантската куќа Control Risks, која оценува дека во речиси 60 насто од земјите во развој постојат сериозни закани за странските инвестиции во политичкото и безбедносното опкружување.

Студијата ги дели земјите според политичкиот и безбедносниот ризик во четири групи и тоа земји со висок, среден, низок и незначителен ризик.

13.11.2007 Подигнување на свеста кај македонските друштва за важноста на практиките на доброто корпоративно управување е целта на проектот на Македонска Берза, кој беше претставен денеска во Скопје.Носителот на проектот за оваа намена изработи „Прирачник за добро корпоративно управување на македонските акционерски друштва“, со поддршка на УСАИД, Меѓународната финансиска корпорација и швајцарската Влада.

Прирачникот треба да биде користен како практична алатка од страна на раководствата на компаниите при планирањето и извршувањето на одлуките во секојдневното работење.

12.11.2007 Јавното обвинителство на Република Македонија во денешното соопштение наведува дека нема место за јавно-обвинителска интервенција  во врска со продажбата на градежното земјиште сопственост на државата, а лоцирано во непосредна близина на трговскиот центар „Рамстор“.

– Објавувањето на јавното наддавање е во согласност со Уредбата за начинот и постапката на оттуѓување, давање под закуп и висината на посебните трошоци на постапките за отуѓување и давање под закуп на градежното земјиште сопственост на Република Македонија, бидејќи истото е сторено во средствата за јавно информирање, а Уредбата не посочува потреба од објава во странските гласила, се вели во соопштението.

12.11.2007 И владејачките и опозициските партии остануваат глуви на забелешките на Европската комисија дека во последната изборна кампања потрошиле повеќе пари од дозволеното, без да се знае нивното потекло. Во ВМРО-ДПМНЕ и во СДСМ немаат конкретен одговор на ваквите забелешки и кратко повторуваат дека работат според прописите. Во Извештајот од ЕК е наведено дека партиите во последната изборна кампања потрошиле повеќе пари од сумата предвидена во Изборниот законик, дека многу донации се од непознато потекло, особено во форма на реклами во медиумите со драстично намалена цена.

Експертите сметаат дека партиите постојано и успешно ја избегнуваат темата злоупотреби при финансирањето на изборната кампања. Не сакаат да ги објават имињата на фирмите што ги финансираат нивните кампањи, зашто со тоа ќе ги откријат најголемите бизнис-врски во државата.
 

09.11.2007 Македонија, според индексот на рамноправност на половите е на 35-те место во светот, покажаа податоците на најновото истражување на Светскиот економски форум, кое опфаќа 128 држави.

Првите места според рамноправноста на половите во економијата, политиката и образованието ги држат нордиските земји Шведска, Норвешка, Финска и Исланд, најлошо рангирана европска држава е Турција, а последните три места во светот ги делат Пакистан, Чад и Јемен.

Од земјите во регионот најдобро е рангирана Хрватска на 16 место, Бугарија е 25-та, а зад Македонија се Словенија (49), Албанија (66), Грција (72) и Турција (121).
 

09.11.2007 Македонија за остварениот напредок во транзицијата во 2007 година доби оценка помеѓу 3,1 и 3,2, во извештајот што денеска го објави Европската банка за обнова и развој (ЕБРД).

Просечната оценка е добиена врз база на девет индикатори, со кои се мерат структурните и институционалните реформи. Оценките се движат од најлоша 1 до најдобра 4+, која означува високоразвиена пазарна економија.

09.11.2007 Владината рекламна кампања на домашен и на меѓународен план не спласнува. И покрај бројните настојувања на јавноста, на медиумите и на невладини институции да се даде отчет за потрошеното и за ефектите од кампањата, од официјалните места и натаму молк. Во најдобар случај, одговорите се сведуваат на своевидни ребуси, од типот дека бројките се во Буџетот.

Владата, сепак, тврди дека процената на „Утрински“ за износот на кампањите е претерана, но не открива колку средства се издвоени за маркетинг-кампањите за привлекување странски инвестиции.

07.11.2007 Нема потпис на купопродажниот договор за земјиштето кај „Рамстор“ предвидено за изградба на луксузен хотел иако поминаа речиси два месеци откако невладиниот сектор и опозицијата за прв пат обвинија дека актуелната Владата го наместила јавното наддавање во корист на бизнисменот Орце Камчев. Во Министерството за транспорт и врски соопштија дека се чека за целиот случај да се изјасни Јавното обвинителство и дека тоа е главна причина што се одолжило потпишувањето на договорот. Оттаму додадоа дека фирмата-победник на јавното наддавање веќе ги уплатила потребните средства.
– По обвинувањата за нерегуларности во постапката за отуѓување на земјиштето, Министерството за транспорт и врски целокупната документација ја достави до Антикорупциската комисија, Јавното правобранителство и Јавното обвинителство. Првите две институции откако ја разгледаа документацијата ни доставија мислење дека не гледаат нерегуларности во целиот случај, меѓутоа се уште чекаме одговор од обвинителството – велат во Министерството.

07.11.2007 Најголемиот број од службените лица не знаат од кое одделение или од кој сектор во институцијата каде што се вработени да побараат податоци за граѓаните. Талкајќи и тропајќи од врата на врата, тие не успеваат да добијат или да комплетираат информација дури ни во законските 30 дена. Одисејата за добивање информации од јавен карактер можеби е најприсутна во министерствата за труд и социјална политика, одбрана, внатрешни работи, транспорт и врски.

Службениците во ресорот што ја покрива сферата на социјалата се први на листата што треба да бидат санкционирани за непочитување на законот. Станува збор за вкупно три прекршочни казни, секоја во износ од 20.000 денари, за кои во Комисијата за заштита на правото за слободен пристап до информациите од јавен карактер не знаат дали се наплатени.