Вести

29.05.2007 Стечајните постапки во Македонија траат предолго, се обесштетуваат и фиктивни доверители, со години се раскрчмува имотот, многу фабрики сосема се обезвреднија. Ограбени останаа фирмите од кои печалеа само поединци. Има низа примери на компании што отишле во стечај и покрај тоа што немало потреба за тоа. Бесконечно долги и тешки за работниците, македонските стечаи во просек траат по нешто помалку од пет години. Скопските „Газела“ и „Центро“, но и уште неколку стотици фирми, се сведоци на стечајни постапки долги по една деценија.

Со новиот Закон за стечај стечајните постапки треба да завршат во рок од шест месеци, а не како досега, тие да се водат повеќе години. Стечајните управници ќе треба да имаат лиценца за работа што ќе се обновува на секои две години. Управникот ќе треба да има и осигурување, а целиот негов имот ќе биде гаранција дека ќе работи чесно. Управниците мора да ја почитуваат законската регулатива, односно ако има план за реорганизација, стечајната постапка да ја завршат за 207 дена, а при ликвидација за 175 дена.  

28.05.2007 Корупцијата го поткопува судскиот систем насекаде низ светот оневозможувајќи им го на граѓаните пристапот до правдата и основното човечко право на правично и непристрасно судење, понекогаш скратување и на самото судење, вели Глобалниот корупциски извештај 2007: Корупцијата во судскиот систем, објавен денеска од Транспаренси Интернешнал, глобалната коалиција против корупција.

„Подеднаков третман пред законот е столб на демократските општества. Кога судовите се корумпирани од лакомост или политичка целисходност , вагите на правдата се искосуваат а обичните луѓе страдаат“- вели Хјуџет Лабел- претседател на Транспаренси Интернешнал. „Судската корупција подразбира дека гласот на невините минува неслушнат, а виновните поминуваат неказнето“.

Во новиот Глобален корупциски извештај се заклучува дека корумпираното судство ја разјадува општествената способност да го процесуира трансинтернационалниот криминал и го инхибира пристапот до правдата и надокнадувањето за прекршување на човековите права. Го поткопува економскиот развој со оштетување на довербата на инвестиционата заедница и ги попречува напорите за редуцирање на сиромаштијата.

23.05.2007 Поранешен долгогодишен висок функционер на Царинската управа на Македонија е осомничен од страна на полицијата за злоупотреба на функцијата во корист на фирмата „Фершпед“.

Полицијата соопшти дека поднела кривична пријава против В.Л.(61), поранешен помошник на директорот во Секторот за царинско-правни работи, бидејќи ја оштетил Царината, односно државниот буџет во висина од околу три милиони и 200 илјади денари во полза на „Фершпед“.

Одделот за организиран криминал утврдил дека В.Л. во 2004 година примил пресуда од надлежен суд дека Царината треба да му плати на „Фершпед“ околу 4,5 милиони денари, за задоцнето плаќање фактури по основа на закуп на деловен простор во период од неколку години. 

23.05.2007 Постојат сериозни индиции дека следењето на комуникациите, аудиовизуелното снимање и користењето лица со прикриен идентитет како посебни истражни мерки се злоупотребуваат. Тие, наместо да помогнат во спречувањето на криминалот, се користат како алатка за повреда на човековите права, предупреди вчера Македонскиот хелсиншки комитет. Во веќе процесуирани шест судски предмети, врз кои е вршен мониторинг, се регистрирани големи недостатоци во процедурата на нивното користење, а судот, за жал, со своите одлуки само ги легализирал.

– Застрашува тоа што надлежната собраниска комисија, која иако постои, досега нема ниту една анализа ниту реакција за примената на посебните истражни мерки – истакна на вчерашната прес-конференција адвокатот Сашо Дукоски. 

22.05.2007 Јавното правобранителство во Македонија, кое сега е владина служба, во иднина ќе функционира како самостоен орган според модел многу сличен на оној што постои во Република Ирска. Мандатот на челниот функционер во институцијата се зголемува од четири на шест години, а притоа останува правото на повторен избор за исто толку години. Оглас за правобранител распишува Владата, а потоа и одлучува за именувањето на предлог на министерот за правда. Другите државни правобранители наместо четиригодишен ќе имаат траен мандат, исто како судиите. Ова се најсуштинските новини во законот за државно правобранителство кои се веќе проследени во парламентот за разгледување и усвојување, по скратена постапка.

Станува збор за редефинирање на статусот на Правобранителството согласно со современите тенденции, компаративните искуства на други земји, а пред се' со уставното уредување. И во европските, и во државите од најблиското опкружување правобранителствата се посебни тела, но со различна организациска поставеност. Имотните права на Хрватска ги заштитува тело во рамките на правосудниот систем, а во Словенија функционира самостоен орган. 

18.05.2007 Во рамките на проектот „Подобрување на корпоративното управување за ‘0’ толеранција кон корупцијата“, Нулта корупција, денес ја одржа шестата работилница посветена на Информатичкиот сектор.

Претставниците од ИТ секторот во својата дискусија ги посочија главните облици на корупција со кои се соочуваат и ги дадоа своите видувања за начините и потребните механизми за успешно справување со истата во рамките на овој сектор. Препораките од денешната, како и од претходно одржаните работилници ќе бидат искористени за изработка на унифициран етички кодекс, чие што прифаќање од страна на стопанските субјекти ќе придонесе кон поуспешно корпоративно управување.

Професорката Антонија Јосифовска од факултетот за бизнис и економија истакна дека е неопходно приватниот сектор да се сврти кон себеси и да ги идентификува своите слабости и преку личното однесување да покаже дека е подготвен да се справи со корупцијата.

Професорот Горан Коевски од Правниот факултет препорача самиот сектор внатрешно да ги прифати минималните стандарди на корпоративната одговорност преку усвојување на етички кодекс, затоа што напредокот на бизнисот е секогаш чекор напред пред легистлативата. Со текот на времето успешните едички кодекси можат да прераснат во закон.

18.05.2007 Заминувањето на Пол Волфовиц од претседателското место на Светската банка отвора врата за новото раководство на банката и виталните управувачки структури да ја задвижат анти-корупциската стратегија напред. Имплементацијата на стратегијата станува критична доколку банката настојува да ја исполни мисијата за намалување на сиромаштијата. 

На 17 април, Транспаренси Интернешнал (ТИ) повика стратегијата да остане врвен институционален приоритет. Нејзината успешна имплементација бара потпора од широк ранг на надворешни и внатрешни чинители,  вклучувајќи ги владите и граѓанското општество, чија поддршка се доведе во прашање со кризата. Националните ограноци на ТИ, ширум светот, се загрижени дека на напорите на банката за унапредување на анти-корупциската реформа во нивните земји е нанесена штета и дека е потребна итна акција за да се обнови кредибилитетот на банката. Капацитетот на банката да се заложи, со нив и со другите граѓански организации, зависи од новото, динамично и кредибилно раководство.

 16.05.2007  Околу педесетина службеници во Државниот завод за геодетски работи биле преместени да работат во друг град бидејќи навреме не ги завршиле предметите или ги решавале преку ред. Таквиот однос на службите во Катастарот се провлекуваше со години наназад и најчесто оваа институција беше посочувана како пример за мито и корупција и главниот кочничар за влез на странските инвеститори. Директорот на Државниот завод, Љупчо Георгиевски ветува дека ќе стави крај на ваквото комотно работење на службите во Катастарот.

– На неколку вработени им е изречена суспензии, а против неколкумина се поднесени и кривични пријави. Во Катастарот воведовме строги критериуми и вработените добија наредби да ги решаваат предметите најбрзо што можат. Сега имотните листови ги издаваме за само еден час – вели Георгиевски.

Во моментов, бројот на нерешени предмети во Катастарот е околу 11.000. Георгиевски вели дека до пред една година таа бројка изнесувала 21.000 во која имало предмети што датираат од 2003 и 2004 година.

конвенција на ОН

15.05.2007 На состанокот на претставниците на граѓанското општество со германскиот канцелар Ангела Меркел, претседателот на Transparency International Хјуџет Лабел се заложи групата од осум индустријализирани нации да усвојат посилнен став против корупцијата на самитот во јуни во Хелигендам, Германија.

„Германското претседавање со Г8 досега покажа дека го разбира значењето на доброто управување и анти- корупцијата, продолжи Лабел. „Но не смее да се застане тука. Како претседавач со Г8, германија има посебна обврска да ја води Г8 кон сигурноста дека анти-корупциските мерки се централен интерес помеѓу обврските во Хелигендам и силно ќе се рефлектираат во финалното комунике. “ 

Корупцијата е примарниот предизвик за силна и стабилна глобална економија. Нејзиното намалување е од суштинско значење за зголемување на материјалната добробит и човечкиот развој во светски најнепривилигираните заедници, за поткрепување на демократијата, заштита на био- различноста, и засилување на глобалната инвестициска клима. 

Во продолжение на состанокот Лабел ја повика Германија неодложно да ја ратификува Конвенцијата на ОН против корупција, патоказот во глобалната законска рамка.  

13.05.2007 Судскиот совет ќе биде комплетиран во текот на неделава, ветуваат припадниците на етничките заедници. Според извори на Вечер, малцинските групи се подготвени да попуштат во дел од новните барања, по што Советот по половина година конечно ќе може да ги добие останатите пет члена, двајца по предлог на претседателот Бранко Црвенковки и тројца избрани од страна на пратениците во Собранието. Според нашиот извор, во текот на неделата ќе биде надмината спрегата меѓу припадниците на етничките заедници и ставот на Владата.

И пратеникот Кенан Хасипи, претседател на пратеничката група на етничките заедници вели дека иако до сега немало нови преговори со Владата, време е неделава конечно да се затвори тоа прашање.
Мораме во текот на неделава да го дефинираме тоа и конечно д а се донесе став. Веќе влеговме во теснец со време и мислам дека треба да се заврши со тоа. Верувам дека ќе има поконкретни работи за зборување деновиве, крајно време е да се стави крај на тоа и да се формира Судскиот совет" – ни изјави вчера Хасипи.

Според него, тие остануваат со истите барања, но сепак, како што кажа има простор да се најде соодветно решение.