Вести

30.01.2007 Коалициите на СДСМ и на ВМРО-ДПМНЕ за четири-пет пати го пробиле законскиот лимит во кампањата за парламентарните избори во 2006 година. По осум милиони евра во гламурозни изборни активности, од митинзи, карвани, платени програми во медиуми, фаци на билборди, флаери, до капи, маици, пенкала, фрлиле двете најголеми партии. Сепак, пиедесталот неприкосновено го држи Социјалдемократскиот сојуз на Македонија кој за време на изборите се' уште беше на власт, но ни малку по расипништво не заостанува ни ВМРО-ДПМНЕ. Ова го тврдат ревизорите кои најавуваат дека ќе ги испочитуваат сите законски рокови до официјалното објавување на извештаите за осум политички парламентарни партии. За евентуалните дубари во финансиите на партиите на кои алудира Државниот завод за ревизија својот збор подоцна треба да го кажат овластените институции, Министерството за внатрешни работи, Јавното обвинителство, Управата за јавни приходи.

„Конкретните бројки за материјално-финансиското работење на партиите во текот на изборната кампања за пратеници ќе бидат достапни за јавноста до крајот на идната недела“, најави вчера главниот државен ревизор, Драгољуб Арсовски. „Ќе биде многу интересно“, додаде Арсовски, мислејќи на наодите до кои дошла екипата ревизори, правејќи контроли и во текот на кампањата, а по потреба се вклучувала и во продолжена ревизија.
 

27.01.2007  Владата не даде отчет колку буџетски пари се потрошени и уште колку ќе се потрошат за нејзините медиумски кампањи: „100 дена Влада“, „Плаќајте даноци“, „Инвестирајте во Македонија – нов бизнис-рај во Европа“, „Македонија – земја на информатичари“.

Не се знае ни колку ќе чинат патувањата и престојот на министрите за странски инвестиции и тие за ангажман на консултантски куќи што ќе лобираат за Македонија.

За реклами на „Даночниот рај“ во 50 тиражни весници од 35 земји, премиерот Груевски процени дека трошокот ќе биде најмногу еден процент од првата инвестиција. Беше спомената и сума од околу 100.000 евра, но неофицијално. За „Плаќајте даноци“ биле искористени старите спотови, снимени во 2001 година, но останува тајна сумата потрошена за закуп на рекламниот простор.
 

26.01.2007 Работата на Антикорупциската комисија во изминатите четири години ја потврди потребата од постоењето на ваков вид независен државен орган.

Ова беше заклучено на денешната последна прес конференција што во актуелниот состав ја одржаа првите членовите на Антикорупциската комисија.

„Антикорупциската комисија за својот четиригодишен мандат постигнат солидни резултати и реши над 60 насто од пристигнатите предмети, од кои за 23 насто Комисијата покрената иницијатива за казнено гонење“, изјави в.д претседателката на Комисијата, Слаѓана Тасева, која нагласи дека успехот на ова тело „ќе беше далеку поголем, доколку институциите подобро функционираа.
 

24.01.2007  Приватниот сектор мора да се справи со поткупот. Домашните стопанственици вчера беа повикани да ги почитуваат меѓународните деловни принципи за справување со поткупот, да овозможат пристап до информации и активно да се вклучат во политиката за заштита на луѓе што ќе обелоденат случаи на корупција. За ова се зборуваше на работилницата „Подобрување на корпоративниот менаџмент за нулта толеранција – трговија“, која ја организира невладината организација „Нулта корупција“ во соработка со стопанските комори во македонија.

– По 16 години транзиција Македонија се' уште се соочува со висок степен на корупција, што се ефектуира на многу аспекти од социјалниот, политичкиот и економскиот живот – рече потпретседателката на „Нулта корупција“, Сузана Салиу.
 

23.01.2007   Министерството за внатрешни работи (МВР) приведе уште четири лица вмешани во случајот „Бачило“ и спорната денационализација.

Како што соопшти денеска МВР, пред истражниот судија, кој ја води постапката изведени се нотарот М.Ќ. (роден 1963) од Скопје, пензионерот К.И. (роден 1958г.) од Велес, ветеринарот М.А. (роден 1959г) од Тетово и Д.С. (роден 1958г) од Штип, вработен како полицаец во Тетово.

Постои основано сомнение дека лицата се инволвирани во случајот, така што Д.С. изготвил службена белешка за извршен увид на гранатираното бачило, ветеринарот М.А. издал три потврди за кои се претпоставува дека се невистини во однос на бројката на стадото кое било прегледано од негова страна, а нотарот М.Ќ. заверувал дел од спорните хипотекарни договори за денационализација на државното земјиште.
 

17.01.2007 Нови 60 внатрешни ревизори ќе проверуваат како одговорните во министерствата и во буџетските институции ги трошат државните пари. Тие годинава ќе се вработат во државната администрација и ќе им се приклучат на сегашните 40 контролори, чија задача е да откриваат дали државните службеници работат чесно и домаќински, или, пак, влегуваат во зоната на незаконско и ненаменско трошење на буџетските средства. На оваа одговорна задача новите 60 ревизори ќе стапат откако ќе поминат специјални обуки во Министерството за финансии, на кои ќе мора да научат многу вештини, како што се ревизија на јавните набавки, откривање ризици, спречување измами и слично. Од нив, 40 ќе бидат ангажирани на централно ниво, а на локално ќе одат 20 нови ревизори, кои ќе го контролираат трошењето на општинските пари.

Овој проект ќе чини еден милион евра, а во него твининг-партнер на нашето Министерство за финансии е владата на Кралството Холандија. 

16.01.2007 Двата земени кредита за хотелот "Изгрев" не се единствените кои ги подигнала фирмата на МПЦ и браќата Миладинови, дознава "Вечер" од банкарски извори. Според нив, за целата работа поднесена е и пријава до надлежните државни органи, поради неможноста на банките да си ги наплатат парите. Ова е втор мега-финансиски скандал кој ја потресува МПЦ. Првиот беше Говрлево, кога скопскиот митропилит и поглавар Стефан, без знаење на црковните органи, дозволи , па експресно го раскина договорот за продажба на црковниот имот на Цементарницата "Усје".
Кријат ли аферите Говрлево и Калишта уште многу црковни скандали поврзани со имотот на МПЦ и нејзиното материјално-финансиско работење? До кога македонските архијереи ќе ги ги оставаат скандалите под тепих?
Случајот со продажбата на имотот во Говрлево заврши без никаква одговорност за никого. Иако договорот со Цементарницата "Усје" беше склучен без знаење на црковните тела, само ден пред синодската седница на која се најавуваше одговорност за инволвираните во случајот, купо-продажниот договор беше експресно раскинат. Архиепископот Стефан се вадеше пред владиците дека тоа е епархиско прашање и дека договорот е раскинат и од тие причини, било беспредметно да се разговара за завршена работа!

12.01.2007 Неспроведувањата на постапки за јавни набавки, како и несоодветно спроведените постапки создаваат можност за измами, грешки, злоупотреба, корупција и набавки по зголемени цени – сметаат ревизорите
Основен суд Скопје 2 во текот на 2005 година извршил набавки од добавувачи, кои не се избрани како најповолни понудувачи и тоа набавки по повисоки цени, утврди Државниот завод за ревизија. За набавка на фотокопир хартија која не е вршена од избраниот најповолен понудувач туку од Фикс-2 ДООЕЛ Пробиштип бил исплатен износ од 555 илјади денари. Со набавката на 2045 пакувања фотокопир хартија по цена од 271 денар која е зголемена за 76,7 денари во однос на понудената на Судот му била нанесена материјална штета за износ од 157 илјади денари. По поголема цена биле набавени и печатени обрасци од повеќе добавувачи Академик Димко, Дуник ДООЕЛ и Алком ДООЕЛ, сите од Скопје, по цени кои се зголемени во однос на понудените. Без постапка за јавна набавка биле потрошени 7.408 илјади денари од кои 3.041 илјада денари се исплатени од сметката за редовно работење.
– Судот како корисник на парите од Буџетот на Македонија пристапил кон склучување на договори за набавка на печатени материјали со добавувачот Фикс-2 ДООЕЛ од Пробиштип и за набавка на тонери со добавувачот Еви Интернационал од Скопје, спротивно на Законот за јавни набавки, по кој истите се сметаат за ништовни, поради пристапување кон склучување договор без Судот да ги извести понудувачите за недобиената согласност за склучување на договор – стои во ревизорскиот извештај.

02.01.2007  Случаите „Бачило“ и „Оружје“ ја одбележаа изминатата 2006 година во Македонија во поглед на корупцијата и борбата против.

Вака решија 19 главни уредници на национални медиуми кои учествуваа во третата годишна анкета на Независната новинска агенција „Макфакс“ и на невладината организација „Нулта корупција“.

Случајот „Бачило“, кој влече корени уште од 2004, со сета своја жестина се појави на почетокот на минатата 2006, кога стигнаа правосилните пресуди за исплата на над 700 илјади евра државни пари, на име на отштета на овчарот Иснифарис Џемаили.

Во судска постапка полна со пропусти, особено во поглед на заштита на државниот интерес, било докажано дека Македонија во 2001 му убила 900 овци на Џемаили и му уништила над 1000 канти сирење.

За овој настан како најкоруптивен во 2006 гласаа 13 од 19-те главни уредници колку што учествуваа во анкетата.