Вести

07.11.2007 Нема потпис на купопродажниот договор за земјиштето кај „Рамстор“ предвидено за изградба на луксузен хотел иако поминаа речиси два месеци откако невладиниот сектор и опозицијата за прв пат обвинија дека актуелната Владата го наместила јавното наддавање во корист на бизнисменот Орце Камчев. Во Министерството за транспорт и врски соопштија дека се чека за целиот случај да се изјасни Јавното обвинителство и дека тоа е главна причина што се одолжило потпишувањето на договорот. Оттаму додадоа дека фирмата-победник на јавното наддавање веќе ги уплатила потребните средства.
– По обвинувањата за нерегуларности во постапката за отуѓување на земјиштето, Министерството за транспорт и врски целокупната документација ја достави до Антикорупциската комисија, Јавното правобранителство и Јавното обвинителство. Првите две институции откако ја разгледаа документацијата ни доставија мислење дека не гледаат нерегуларности во целиот случај, меѓутоа се уште чекаме одговор од обвинителството – велат во Министерството.

07.11.2007 Најголемиот број од службените лица не знаат од кое одделение или од кој сектор во институцијата каде што се вработени да побараат податоци за граѓаните. Талкајќи и тропајќи од врата на врата, тие не успеваат да добијат или да комплетираат информација дури ни во законските 30 дена. Одисејата за добивање информации од јавен карактер можеби е најприсутна во министерствата за труд и социјална политика, одбрана, внатрешни работи, транспорт и врски.

Службениците во ресорот што ја покрива сферата на социјалата се први на листата што треба да бидат санкционирани за непочитување на законот. Станува збор за вкупно три прекршочни казни, секоја во износ од 20.000 денари, за кои во Комисијата за заштита на правото за слободен пристап до информациите од јавен карактер не знаат дали се наплатени.

06.11.2007 Македонија нема датум за преговори за членство во Европската унија (ЕУ) во најновиот извештај на Европската комисија објавен денеска во Брисел и тој момент е одложен најмалку за една година.

„Македонија има голем прогрес во битката со корупцијата. Политичките конфликти што продолжуваат, малку го одолжуваат нејзиниот дијалог (со ЕУ) и затоа, овој политички дијалог ќе треба да се подобри, за да се подобри нивниот (на Македонија) моментум следната година во исто ова време“, изјави еврокомесарот за проширување Оли Рен при презентација на извештајот.

Македонија во извештајот е пофалена и за економските реформи, а критикувана е за реформите во јавната администрација и правосудството.
 

06.11.2007 Повторното воведување на категоријата привремени објекти со последните предложени измени и дополнувања на Законот за градење создава непотребен извор на можна корупција. На тоа упатува и досегашното искуство, па оттаму не е препорачливо враќање на привремените објекти. Ова е ставот на Државната комисија за спречување на корупцијата, која откако го разгледа Предлог-законот за изменување и дополнување на Законот за градење, констатираше дека и покрај неговата современост, бидејќи во себе содржи начини за решавање на дел од проблемите од областа на градежништвото, сепак, неговата содржина не е приспособена на нашите прилики, што придонесува тој да создава можности за злоупотреба во практичната примена.
 

30.10.2007 Македонија е прва земја во регионот што ќе ја потпише Финансиската спогодба со Европската Комисија (ЕК) со што ќе може да ги користи средствата од Инструментот за претпристапна помош (ИПА).

Ова го соопшти Секретаријатот за европски прашања по повод денешното потпишување на Финансиската и Рамковната спогодба меѓу македонската Влада и Европската Комисија

30.10.2007 Четиринаесетчлениот Судски совет вчера почна со изборот на 18 судии за новоформираниот Управен суд. Од списокот со над 240 пријавени кандидати, членовите во претпладневниот дел ја направија првата селекција во која се пласираа сите оние што ги исполнуваат условите и добиле најмалку пет гласа од членовите.
„Поминуваме на втората фаза од разгледување на листата. Треба да се изберат 18 судии, а за претседател дополнително ќе се распише оглас. Од потесниот круг кандидати ќе се гласа за секого одделно, а за избран судија ќе се смета оној што добил две-третини од гласовите, или 10 гласа.

Доколку се случи над 18 кандидати да имаат ист број гласови, ќе има нов круг на гласање“, објасни вчера претседателот на Судскиот совет, Бекир Исени. Тој вели дека на листата има квалитетни кандидати и се надева дека ќе изберат добри судии. По исцрпувањето на оваа точка, Судскиот совет денес ќе продолжи и со изборот на судии за Апелациониот суд во Гостивар.

25.10.2007 Македонската влада нема да го потпише договорот за продажба нa ТЕЦ Неготино со конзорциумот Хач, кој победи на тендерот, бидејќи не ги исполнил сите услови.

Ваква одлука донесе Владата на последната седница, соопшти денеска вицепремиерот за економски прашања Зоран Ставревски, кој беше претседател на тендерската комисија за приватизација на ТЕЦ Неготино.

„Врз основа на извештајот на тендерската комисија и Mинистерството за економија констатирано е дека не се исполнети условите што Владата ги побара од прворангираниот конзорциум неопходни а склучување на договорот “, изјави Ставревски.

Тој појасни дека одлуката е донесена врз анализа на извештајот, во кој што биле наведени сите услови кои требало да ги исполни конзорциумот, но истите не биле доставени.

25.10.2007  Дваесетина обвинители повеќе две и пол години работат со истечен мандат, зашто политичарите не можат да се договорат дали тие треба да бидат реизбрани или за тие места да може да конкурираат други лица.
Советот на јавните обвинители, на чие чело е обвинителот, пред десетина дена писмено побарал од Собранието да распише оглас за назначување обвинители, но до сега не е распишан.

Во Законот за јавното обвинителство од 2004 година, со кој се воведе траен мандат за обвинителите, пишува дека назначените обвинители ќе си ја вршат функцијата до истекот на мандатот, по што ќе бидат назначени на истите функции без ограничување на мандатот. Во Законот е нагласено дека постапката за назначување треба да почне шест месеци пред да истече мандатот.

25.10.2007 Иако фирмата „Семос“ е првопласирана и при второто бодување на јавниот оглас за избор на најповолен понудувач што ќе изработи софтвер за услугата преносливост на броеви, повеќе од десет дена е блокирано потпишувањето на одлуката од надлежните во Агенцијата за електронски комуникации. Од „Семос“ стравуваат дека со ова повторно се прави обид да се одолжи спроведувањето на јавниот оглас под притисок на политички кругови, на кои не им се допаѓа тоа што еден од сопствениците на оваа фирма е и сопругата на претседателот Бранко Црвенковски.

Во Агенцијата за електронски комуникации велат дека нема каков било политички притисок, ниту обид за одолжување на јавниот оглас.