Вести

18.10.2007  Царинската управа на Македонија дополнително ќе ги зајакнува своите капацитети со помош на консултантски услуги на специјализирана агенција.

Ова денеска во Скопје го соопшти министерот за финансии Трајко Славески, кој што во име на македонската Влада пред неколку дена потпишал договор со британската агенција Crown Agents.

„Договорот е вреден 7,5 милиони евра, а е потпишан за наредните 24 месеци“, рече Славески прецизирајќи дека износот ќе биде исплатен пропорционално од буџетите за 2007, 2008 и 2009 година.

17.10.2007 Конфискуваниот имот ќе биде нов извор за полнење на буџетот. Со привремено одземениот имот ќе стопанисува дирекција како правно лице, а директорот на ова тело ќе го именува Владата. Ова е суштината на Законот за управување со конфискуван имот, имотна корист и одземени предмети во кривична и прекршочна постапка веќе доставен во собраниска процедура. Според предлогот, кој ќе оди во две фази, парите од продажба на неподвижниот и движниот имот одземен со правосилна судска одлука, веднаш по правосилното завршување на постапката, ќе се слеваат во народната каса. Имено, 20 проценти од средствата ќе одат директно во буџетот, а по 20 отсто на буџетските ставки наменети за финансирање на судската власт, Јавното обвинителство, дирекцијата, која допрва ќе се конституира, и Управата за извршување на санкции.

11.10.2007 Обидот на Владата да потпише договор за продажба на термоцентралата Неготино со конзорциумот „Хач“ е најматен, а Индексот за перцепција на корупцијата на „Транспаренси интернешнал“(ТИ) е најбистар настан во септември во Македонија.

Ова е оценка на главните уредници на 16 највлијателни печатени и електронски медиуми во Македонија, во анкетата „Бистро – Матно“ на Независната новинска агенција Макфакс и на невладината организација Транспарентност – Нулта корупција.

Вкупно 11 од 16 гласови во рубриката „матно“ се однесуваа на случајот „Хач“-втор пат, бидејќи овој случај беше и меѓу предлозите за најматни настани во август.

09.10.2007  Мислење на експертскиот тим на “Транспарентност – Нулта корупција”,по претставка во врска со јавно надавање за отуѓување на градежното земјиште лоцирано зад трговскиот центар Рамстор, сопственост на Република Македонија, наменето за изградба на хотел.

На 14. 09. 2007 година политичката партија СДСМ  до ТРАНСПАРЕНТНОСТ – НУЛТА КОРУПЦИЈА достави претставка во врска јавно надавање спроведено од Министерството за транспорт и врски, за отуѓување на градежното земјиште лоцирано зад трговскиот центар Рамстор, сопственост на Република Македонија, наменето за изградба на хотел.

Врз основа на член 4 од Законот за слободен пристап до информациите од јавен карактер, со писмо број 0302-123 од 17.09.2007 година Транспрентност – Нулта корупција се обрати до Министерството за транспорт и врски со барање да бидат доставени или да бидат достапни документи и информации кои се однесуваат на јавното наддавање за отуѓување на градежното земјиште лоцирано зад трговскиот центар Рамстор, сопственост на Република Македонија, наменето за изградба на хотел.

05.10.2007 НЛБ Тутунска банка освои сертификат за добро корпоративно управување во изборот организиран од Транспарентност – нулта корупција во соработка со стопанските комори во земјава. Наградата за успешно корпоративно управување се доделува првпат.

Во рамките на проектот за избор на компанија со добро корпоративно управување, тим на експерти составен од претставници на стопанските комори, јавниот сектор, универзитетски професори и претставници на медиумите и невладиниот сектор, подготвија листа на критериуми врз основа на кои се изврши изборот на компаниите. Критериумите се однесуваа на активностите на менаџментот на компанијата, односот кон вработените, комуникацијата со потрошувачите, релациите со снабдувачите, како и придонесот на компанијата во заедницата и околината во која дејствува.

03.10.2007 Македонија почна да создава фронт за борба против корупцијата, но уште многу треба да стори во јакнење на независноста на истражните и судските органи, на невладиниот сектор и на демократијата.

Ова е оценка од конференцијата што во организација на Невладината организација „Транспарентност – Нулта корупција“ е одржана денеска во Скопје. На конференцијата за спроведување на Декларацијата за нула толеранција на корупцијата, што е потпишана пред две години, зборуваше доктор Слаѓана Тасева.

На претставници на пет организации им беше врачена наградата за успешно корпоративно управување, што се доделува прв пат, во рамки на спроведувањето на Декларацијата за нула корупција. Добитници се две фирми од областа на ИТ технологијата – Дуна компјутери и Инет- АД, две банки – Прокредит и НЛБ тутунска, како и Еуролинк-осигурување.

26.09.2007 Според Индексот на перцепција на корупцијата (ИПК) за 2007 година, објавен денеска од страна на Transparency international – глобалната коалиција против корупцијата, поделбата на перцепираните нивоа на корупција во богатите и во сиромашните земји останува остра како и секогаш. Развиените и земјите во развој мора да ја поделат одговорноста за намалување на корупцијата и  справувањето, како со страната која дава, така и со страната која бара мито.

„И покрај одредени придобивки, корупцијата останува огромно одлевање на ресурси кои се потребни за образование, здравство и инфраструктура“, рече Хјуџет Лабел, претседател на Transparency international. „Земјите со низок резултат треба да ги сфатат овие резултати сериозно и да дејствуваат веднаш за зацврствување на одговорноста во јавните институции. Исто така значајно е и дејствувањето од земјите со висок резултат, посебно во уништување на корупциските активности во приватниот сктор“.

CPI2007_lista_na_zemji

ti_cpi_najcesto_postavuvani_prasanja

metodologija_na_cpi

cpi2007_sources_eng

22.09.2007 Во Македонија постојат мала група луѓе што поседуваат огромни ресурси и ги користат на нетранспарентен начин да влијаат врз политичките процеси за да остварат сопствени цели.

Поради тоа Светската банка во 2006 година ја оцени Македонија како заробена земја, рече Слаѓана Тасева, поранешна членка на антикорупциската комисија на вчерашната трибина на тема „Олигархијата и македонската транзиција“, која ја организира Стопанската комора на Македонија.

 
Спорната приватизација, дали во Македонија постојат олигарси во позитивна или само во негативна конотација и кој е виновен за одливот на општествениот капитал на приватни сметки беа само дел од темите што ги зачнаа академикот Никола Кљусев, Џевдет Хајредини, поранешен Министер за финансии, Кираца Трајковска, втор човек во „Фершпед“ и повеќе новинари.

Според Тасева, отсуството на регулатива во деведесетите и шурувањето на политиката и бизнисот во текот на приватизацијата, а и денес се главните причини за лошиот епитет „заробена земја“,со кој е оквалификувана Македонија.