Договорот за продажба на ОКТА може да се поништи

udripari

17.08.2007  Договорот за купопродажба на рафинеријата ОКТА може да се поништи, ако се утврди дека при негово склучување имало корупција и злоупотреба на службената положба.

Ова го тврди адвокатот Драган Малиновски, поранешен претседател на Државната комисија за спречување на корупцијата, во изјава за денешен скопски „Дневник“, додавајќи дека со тоа може да се одбегне плаќање на отштета.

Државната комисија за антикорупција во поранешниот состав, во 2003 година, поднесе иницијатива за кривичен прогон, откако оцени дека договорот за купопродажба на ОКТА е „коруптивен акт“, изјави Малиновски.
Немало од никаде одговор на иницијативата, но според адвокатот договорот за купопродажба на ОКТА може и денес да се поништи, поради злоупотреба и корупција при негово склучување.

Барометар на корупција за месец Јули 2007 г.

bistromatno

08.08.2007  Инволвирање на надлежен министер за вклучување на фирма на неговиот партиски шеф во јавен проект – водовод и брана „Злетовица“, е најматен настан во јули.

Тоа е избор на 12 главни уредници на национални медиуми во месечната анкета „Бистро-Матно“ на Независната новинска агенција "Макфакс" и невладината организација "Транспарентност – Нулта корупција".

Според анкетата во која учествуваа 16 медиуми првото место на листата на бистри настани рамноправно со по седум гласови го делат два настани Тоа се: бесплатната телефонска линија на Здружението на новинари на Македонија (ЗНМ) за пријавување на можната корупција меѓу новинарите, како и Фондот за здравствено осигурување кој врати долг од 26 милиони евра.

Владата го прифати Предлог законот за управување со конфискуван имот

coins

04.08.2007 Владата на Република Македонија на последната седница го прифати Предлог законот за управување со конфискуван имот, имотна корист и одземени предмети во кривична и прекршочна постапка со кој се врши усогласувањето на оваа материја со најновите меѓународни стандарди и се заокружува законската рамка во Македонија во борбата против корупцијата и организираниот криминал, информира на денешната прес-конференција владиниот портпарол Ивица Боцевски.

 

– Причините за донесувањето на овој закон се огледуваат во фактот дека постапувањето со конфискуваните предемти е еден од можните извори на корупција. Со донесувањето на овој закон ќе се обезбеди правна рамка која ќе го регулира начинот за управување и постапување со конфискуваниот имот и одземените предемти и домаќинско управување на надлежните органи засновано врз начелата на законитост, економичност и ефиканост, рече Боцевски. Тој појасни дека при изготвувањето на законот биле користени искуствата од постарите, но и од новите земји членки на ЕУ.

 

Во втората фаза од децентрализацијата влегоа 42 општини

 minfin

01.08.2007 Половина од 84-те општини добија дозвола за влез во втората фаза од фискалната децентрализација и од есен ги преземаат надлежностите во образовната, социјалната и културната сфера.


– Вкупно 42 општини во Македонија преминуваат во втора фаза од фискалната децентрализација, соопшти денеска министерот за финансии Трајко Славески, додавајќи дека процесот останува отворен.

Објавени имотните листи на македонските функционери

 dksknatpis

30.07.2007 Имотните листи на државните раководители и носителите на други јавни функции во Македонија денеска за прв пат јавно ги објави Државната комисија за спречување на корупцијата.

На официјалниот веб сајт на Антикорупциската комисија се објавени податоци за имотите на шефот на државата Бранко Црвенковски, претседателот на Собранието Љубиша Георгиевски, премиерот Никола Груевски, како и на министрите и на пратениците.

На предолгите процеси не може да им се „суди“

sudstvo

30.07.2007  Граѓаните не можат да се заштитат од предолгите судски процеси, иако со новиот закон за судови им е дадено тоа право да го остваруваат во Македонија наместо, како досега, само пред Европскиот суд за човекови права во Стразбур.

Дваесетина граѓани од почетокот на годинава, кога законот стапи во сила, поднесле барања за заштита на правото на судење во разумен рок, но Врховниот суд не ги решава оти нема како.

– Во законот има недоречености и без да биде изменет не може да се спроведе ефикасно. Ова е еден од важните правни проблеми што мора да ги решиме за да се приближиме кон европското законодавство. Ставени сме во ситуација да имаме надлежности, а да не може да ги решаваме барањата на граѓаните за заштита на ова право. Донесовме правно мислење за проблемот и го известивме Министерството за правда дека се неопходни измени на законот – вели Дане Илиев, претседател на Врховниот суд.

Академијата ќе подготвува 27 кандидати за идни судии и обвинители

vaga-mkd

30.07.2007  Академијата за обука на судии и обвинители во Скопје, од средината на септември почнува со едукација на 27 кандидати кои ги минале сите квалификациски и приемни тестирања. Обуката за правниците и адвокатите кои треба да се кандидираат за идни судии и обвинители ќе трае 15 месеци. Првите пет месеци ќе ги совладуваат теориските знаења од браншата за која се квалификуваат, а другите десет месеци се предвидени за практична обука во судовите, обвинителствата, но и во странство. На предавањата на македонски јазик едукатори ќе бидат судии и јавни обвинители, професори од Правниот факултет, од Штуловиот универзитет, експерти од установи.

Специјализирана дирекција ќе менаџира со конфискуван имот

court-wall

27.07.2007  Специјализирана дирекција ќе менаџира со конфискуван имот се' до завршување на кривична, управна и царинска постапка. Оваа посебна организациона единица во Министерството за правда ќе треба да реши што понатаму со запленетото и како да се задржи неговата вредност за идна, можна конфискација. Вакви системи, развиени до перфекција, постојат во некои европски држави, како што се Холандија или Велика Британија.

„На првата наредна седница Владата треба да визира закон што ќе ги расчисти сите дилеми околу управувањето со одземен имот во постапка за конфискација“, најавува министерот за правда, Михајло Маневски. Не откривајќи повеќе детали, тој вели дека запленетите предмети, како на пример, возила или техника, во иднина ќе се чуваат на едно место во државата, во централно депо лоцирано близу Идризово.

Во Македонија се донесуваат решенија за конфискација на имот, но нема кој да ги спроведе. Веројатно, овој закон ќе биде основа државата да почне да стопанисува со замрзнат имот, без разлика дали станува збор за луксузни вили или за објекти на пропаднати компании.

ЦКГ објави мерки за намалување на корупција во јавните претпријатија и установи

stopcorruption

23.07.2007 Центарот за граѓански комуникации од Скопје денеска објави препораки за преземање мерки за стеснување на просторот за корупција во јавните претпријатија и установи.

Потребата од преземање на предложените мерки произлегува од констатираниот широк простор за корупција во јавните претпријатија и установи што го овозможуваат слабата регулација на оваа сфера и партизацијата на овие институции, се вели во соопштението од Центарот за граѓански комуникации.

До предложените мерки Центарот дошол преку истражување на формите, начините и чинителите на корупцијата во јавните претпријатија и установи, преку прибирање мислења и наменски експертизи на домашни стручњаци за мерките што треба да се преземат за намалување на корупцијата. Направени се и консултации со домашни јавни и приватни институции и организации. За предложените мерки земени во предвид се и решенијата и најдобрите практики што се спроведуваат во другите земји од регионот, ЕУ и светот, како и препораките од меѓународните институции и организации. Организирана е и завршна работилница со засегнатите страни за финализирање и приоретизирање на мерките на која е направено нивно адаптирање и конкретизирање. 

Нема мисија без европска комисија

macovei

19.07.2007  Моника Маковеј, советничката за антикорупција на Владата веќе десетина дена ги скенира институциите кои работат против корупцијата, а ја чита и македонската легислатива, за до септември да го изготви својот план и да и предложи на Владата конкретни антикорупциски мерки. Од своето досегашно искуство како министер за правда во Романија, Маковеј вели дека најтешко се сузбива политичката корупција.

 

– Во Романија се борев со политичка корупција и некои корумпирани политичари. Тоа е најтешко, бидејќи кога се стига до големите риби од политичкиот врв, одеднаш гледате како сметаат дека не треба поддршка во борбата против корупцијата и сметаат дека институциите се премногу независни – изјави Моника Маковеј, советничка на Владата во борбата против корупцијата. Во Романија, според Маковеј, голем проблем била несоработката меѓу институциите во борбата против криминалот и корупцијата. Антикорупциската ѕвезда на Југоисточна Европа смета дека може да ја подобри соработката меѓу македонските институции и европскиот директорат, за вистински да бидат вреднувани домашните резултати, а и преставниците на обвинителствата, судовите и сите други институциите да научат да работат по европски стандарди.