Вести

Случај „NUMBER PORTABILITY,,

09.05.2008 Во месец јули 2007 година Комисијата за јавни набавки (КЈН) на Агенцијата за електронски комуникации (АЕК) распиша отворен повик за набавка на софтвер за реализација на преносливост на броеви заедно со изворен код за одржување на системот и Централната база за пренесени броеви за реализација на преносливост на броеви и за функционални барања на системот за реализација на преносливост на броеви. Овој проект треба да им овозможи на граѓаните при промена на мобилниот или фиксниот оператор да  го задржат бројот и префиксот што го користат.

            Тендерот побуди интерес во јавноста од причина што Владата на РМ има обврски од потпишаниот договор со ,,Мобилко,, според кој имплементацијата на овој проект требаше да почне од 1 септември минатата година. По основа на потпишаниот договор компанијата може да бара отштета, а истата ќе се плаќа од буџетот на државата. Исто така, поеради ова и Европската Комисија за електронски комуникации и јавно ја обвини Република Македонија за одолговлекување на имплементацијата на проектот NUMBER PORTABILITY, со што ги остава во нерамноправна позиција новите оператори. Дополнителен негативен ефект од невоведувањето на овој систем се и скапите услуги на фиксната и мобилната телефонија.

 09.05.2008 Државната комисија за спречување корупција очекува власта да се воздржи од трошење средства во предизборниот период, за што досега се поведени 16 постапки кои се однесуваат на огласи за вработување и јавни набавки. Комисијата испратила писмо до Владата да се повлече огласот за стипендии за асистенти, а повела постапка за опремување на селските амбуланти и за најавените пет илјади вработувања.

„Државните органи не се учесници во изборите и не треба да се рекламираат во овој период. Затоа е важен член 14, од аспект на наведување на гласачите. Нивното ветување дека нешто ќе направат и ќе одвојат толку средства, макар и како морално почитување на режимот на антикорупциско однесување, е под наше дежурно внимание и треба да има воздршка“, изјави претседателката на Комисијата, Мирјана Димовска.

08.05.2008 Владините кампањи и спотови, со кои деновиве се бомбардира јавноста, како „Ти си Македонија“, кампањата за многудетно семејство, за бесплатни лекарски прегледи и „Образованието е сила“, претставуваат интензивна предизборна пропаганда со која владата собира предизборни поени. Со тоа директно се крши Законот за избори, оценуваат невладините организации за борба против корупцијата. Најпроблематично, според нив, е што ваквиот маркетинг на владата ќе продолжи да се форсира и во екот на предизборната кампања. Освен кампањите, речиси секое министерство преку реклами се фали за сработеното и преку платени огласи ги советува граѓаните. Така, на пример, Министерството за финансии објави оглас во кој на граѓаните им дава совети за предностите и недостатоците на купување автомобил на кредит или на лизинг.

07.05.2008 Transparency International (ТI) се залага за навремена имплементација на јасен и мандатен регистар за лобирање на Европската Комисија, свикан од Комитетот за уставно надворешно право на 1 Април 2008 година.

Европскиот Парламент ќе гласа утре на 8ми Мај за регистарот за лобисти од Европските институции. TI нагласува дека мандатниот регистар на Комисијата треба да се гледа само како прв чекор, и го поддржува повикот на Парламентот за развивање на здружениот регистар за Парламентот, Советот и Комисијата градејќи врз искуството и инфраструктурата на регистарот на Европската Комисија, наскоро да биде објавен.  

30.04.2008 Денес, на 30.04.2008 година, со почеток во 11 часот, во просториите на Министерството за Економија се спроведе постапката за отворање на понудите за тендерот за изградба на ХЕЦ Чебрен и ХЕЦ Галиште на Црна Река. Според проценките направени во рамки на студијата на генерални инвестиции ( General investment study) изработена во рамки на CARDS програмата во 2004 година, проценките за вредноста на изградба на овие капитални објекти се 159 милиони евра за Чебрен и 200 милиони евра за Галиште, што ја прави оваа инвестициона зделка поголема од онаа за продажбата на ЕСМ. Покрај ова, учесникот на тендерот ќе ја добие и ХЕЦ Тиквеш која се проценува на 1.4 милиони евра, а произведува струја од 200 ггвч.

30.04.2008 Слободата на медиумите во Македонија е намалена во 2007 година оценува во годишниот извештај американската невладина организација „Фридом Хаус“, рангирајќи ја земјата на 100. место. Медиумите се послободни во: Словенија (46), Бугарија (76), Хрватска (78), Црна Гора (81), Србија (84), Романија (94) и Босна и Херцеговина (97). Од земјите во регионот Македонија, според слободата на медиумите е подобро рангирана само од Албанија (105).

Македонија во извештајот на „Фридом Хаус“ има 47 бодови и е во категорија на држави со „делумно слободни” медиуми. Една година претходно Македонија беше на 98. место со 45 бода. Рангирањето во истражувањето е во распон од 0 (нула) – најслободни до 100 – најмалку слободни.

7.04.2008 Transparency International (TI) – глобалната антикорупциска коалиција и Enablon, водечкиот провајдер за корпоративно одговорен менаџмент софтвер, денес го презентираа Анти Подмитувачкиот Систем на Enablon (Anti-Bribery System – ABS), веб-базиран, анти-мито, самооценувачки алат за компаниите кој што сакаат да го спречат митото во нивната работа.

21.04.2008 Организациите на цивилно општество имаат клучна улога во подигнувањето на свеста дека неопходните реформи во земјите се спроведуваат не заради Европската Унија, туку за доброто на граѓаните, смета еврокомесарот за проширување Оли Рен. На Конференцијата за развој на цивилното општество во Југоисточна Европа, која се одржа во Брисел и на која присуствуваа 450 учесници од цела Европа, Рен изјави дека би сакал луѓето во регионот себеси да не се гледаат како луѓе што преземаат исполнување на однадвор наметнати услови, туку како луѓе што ја создаваат сопствената иднина. Според еврокомесарот, претставниците на цивилното општество се мост помеѓу институциите на ЕУ, националните власти и граѓаните и тие организации може да ја подигнат свеста за успесите и предизвиците на проширувањето на ЕУ.

19.04.2007 Сите јавни набавки и вработувања се со буџетски пари, велат во Министерството зафинансии,а експертите сметаат дека активностите, освен неопходните, во изборниот период треба да мируваат

Владата ги користи недореченостите и двосмисленостите во Законот за спречувањето на корупција за непречено да троши државни пари за промотивни цели. Вака експертите гледаат на последните конкурси за вработувања и за јавни набавки што ги спроведува Владата.Пред неколку дена претседателката на невладината „Транспарентност-нулта корупција“, Слаѓана Тасева, предупреди дека е можно да се изигра законот, кој забранува вонредни исплати и почнување нови проекти од моментот на распишувањето на изборите. Иако се ограничуваат вонредни исплати и почнување нови проекти, одредбата во законот завршува со: „освен ако за таа намена не се обезбедени пари од буџетот“.