Вести

04.04.2007 Промена на свеста кај граѓаните и воведување на построги закони се клучни во борбата против корупцијата.

Ова се заклучоците од денешната тркалезна маса, што ја организираше „Нулта корупција“, на тема „Соработката меѓу политичкиот и граѓанскиот сектор“.

Организаторите на тркалезната маса, особено се задржаа на средствата што политичките партии ги потрошија за време на минатогодишната кампања за парламентарните избори, при што беа објавени нови податоци, кои не соодветствуваа со оние што партиите претходно ги пријавија.

Се работи за податоци собрани во десет градови, според кои парите што ги потрошиле најголемите македонски политички партии, се разликуваат од претходно пријавените суми, а разликите се дури и до два милиона евра.

Ваквата појава беше поврзана со целокупната корумпираност во државата, што според учесниците многу често се поврзува со политиката.
 

30.03.2007 Финансирањето на Судскиот совет и на судството, воопшто, мора да се „одлепи“ од другите две власти ако сакаме граѓаните да стекнат доверба дека тие се навистина независни и самостојни, сметаат членовите на Советот за судски реформи.

– Судскиот совет е орган од исклучителна важност и со големи овластувања, но мора да ја стекне довербата на граѓаните како независен и самостоен. Министерството за правда треба да размисли за неговото финансиско осамостојување – рече народниот правобранител Иџет Мемети.

Според Законот за судскиот буџет, судовите даваат свои процени на финансиските потреби, но Владата одредува колку пари ќе се префрлат од државниот во судскиот буџет.

 – Овој закон е надминат и мора да се смени. Во спротивно, има зависност. Нерамноправноста помеѓу судството и другите две власти е јасна. Тоа се гледа и во неоправданото одолжување на изборот на другите пет члена на Советот од Собранието Три месеци бараме согласност за вработување државни советници. Извршната и законодавната власт мислат дека реформите треба да ги спроведуваат само судиите и Министерството за правда – рече претседателот на Судскиот совет, Бекир Исени.

Министерот за правда Михајло Маневски рече дека реформите во судството ги дале првичните резултати.

23.03.2007 Стотици милиони долари со сомнително потекло како директни странски инвестиции вложиле Кипар, Холандските Антили, Британските Девствени Острови, Сент Винсент и Гренадини и повеќе карипски острови-држави во изминатава декада во Македонија. Само од 1997 година досега од егзотичните држави познати по либералната даночна власт и никаква контрола за потеклото на капиталот што се вложува во тамошните банки во земјава влегле безмалку 160 милиони долари. Се купувале акции во постојни компании, се инвестирале пари во услужната дејност, во недвижнини и помала стапка во производствени капацитети.

Според официјалните податоци на Народна банка, Кипар со околу 194 милиони долари или 9 отсто од вкупните инвестиции во земјава, по Унгарија, Грција и Холандија, на крајот од 2005 година бил четврти најголем странски инвеститор во Македонија. Само во 1998 година, Кипар во земјава вложил 61,5 милиони долари. Податоците покажуваат дека поголем дел од овие пари биле инвестирани во услужни дејности, во недвижен имот, во трговија и во прехранбената и хемиската индустрија. Во периодот од 1997 година до 2006 година од Британски Девствени Острови влегле околу 25 милиони долари директни странски инвестиции, а од Сент Винсент и Гренадини безмалку 20 милиони долари. Само во 2004 година од Холандските Антили во Македонија биле инвестирани повеќе од 10 милиони долари. На листата на егзотични странски вложувачи се и Кајманските Острови со околу 2,5 милиони долари, Панама со околу 2 милиони долари и европскиот Лихтенштајн со безмалку 10 милиони долари. Помали суми се вложувани и од Бермудите, Бахамските Острови, Сан Марино и Девствените Острови. 
 

22.03.2007 Експерти од Советот на Европа в понеделник ќе дојдат во Македонија за да проверат какви мерки преземаат институциите за да го спречат перењето пари. Уште од сега се најавува дека државата ќе потфрли кај контролата на казината и спроведувањето на законите во практика.
Под лупа на Комитетот на експерти ќе бидат брокерски куќи, казина, менувачници, банки, адвокатската и нотарската комора, судови, Јавното обвинителство. Ќе се цени работата и на Дирекцијата за спречување на перење пари, Народната банка, Царинската управа, Управата за јавни приходи, антикорупциската комисија и на неколку министерства.
– Ќе се оценува ефикасноста на целиот систем, преку механизмите што ги има државата за контрола против перење пари и финансирање тероризам. Извештајот на експертите ќе биде достапен за сите земји членки на Советот на Европа. Ќе има и препораки како да се надминат слабостите, со кои државата ќе мора да се справи по секоја цена – велат во Дирекцијата за спречување на перење пари.

19.03.2007 Каква вода пиеме? Колкави се платите на функционерите и на државните службеници? Што содржи сопственото болничко досие? На овие и многу други прашања граѓаните можат да побараат одговор од институциите. Во изминативе шест месеци од функционирањето на Законот за слободен пристап до информации, 513 граѓани поднеле барање за добивање информации од јавен карактер. Граѓаните своето право да бараат информации од јавен карактер од институциите и воопшто од имателите на информации го стекнаа на 1 септември 2006 година, кога почна со имплементација Законот за слободен пристап до информации од јавен карактер. Големо интересирање се покажува за информациите од Министерството за труд и социјална политика, од МВР, од Управата за јавни приходи на град Скопје,како и од А.Д. „Топлификација“. Сепак, најбарани информации се оние кои се однесуваат на финансиското работење на институциите и на тендерските распределби. 
 

15.03.2007 Секретаријатот за европски прашања (СЕП) при македонската Влада денеска го промовираше проектот „Антикорупциски мерки“, финансиран од страна на Владата на Кралството Норвешка.

„За да се привлечат странски инвестиции, потребна е транспарентна борба против корупцијата. Транспарентната влада може да им донесе многу добра на луѓето. Граѓаните мора да и веруваат на Владата, односно да знаат дека никој не може да влијае врз нејзината работа“, рече на денешната промоција на проектот Нилс Рагнар Камсваг, заменик генерален директор во Министерството за надворешни работи на Кралството Норвешка.

Тој додава дека транспарентноста и борбата против корупцијата се важни и за евроатланските процеси.

„Ние ги поддржуваме проектите во Македонија за да се осигураме дека македонската влада учествува во ова и ги прави сите работи потранспарентни. Посебно е важно што ваквите проекти се поттикнувани од македонската влада“, вели Камсваг.

Според него, оваа година е намалена помошта што Кралството Норвешка ја дава на балканските држави, вклучително и Македонија, што е доказ дека „веќе има многу прогрес во регионот и дека средства се потребни и на другите земји“.

13.03.2007 Воспоставување на етички кодекс и следење на меѓународните деловни принципи е целта на денешната работилница што ја организира „Нулта корупција”.

Работилницата, која се одржа во хотелот Стоун Бриџ, е посветена на темата ”Подобрување на корпоративниот менаџмент за нулта толеранција за корупцијата”, а денеска се организира во рамки на секторот за услужни дејности.

Особен акцент, истакнаа организаторите, треба да се стави на заложбите за транспарентен менаџмент, зајакнување на етичкото управување, транспарентност во работењето и подобрување на корпоративното управување.

11.03.2007 Ослободителната пресуда за Агим Красниќи и полициската акција против корумпирани полицајци и цариници, се случаите што оставија белег во февруари годинава, во поглед на можностите за корупција и борбата против.

За овие два настанаа гласаа најголем број од 16 уредници на национални медиуми, кои учествуваа во последната редовна месечна анкета „Барометар на корупцијата“, што ја спроведуваат НВО „Нулта корупција“ и Независната новинска агенција Макфакс.

За случајот „Ослободителна пресуда за Красниќи“ во рубриката „матно“ гласаа 11 од 16 главни уредници на националните електронски и печатени медиуми. Тие се согласни дека е донесена „експресна судска одлука“ на судијка во Основен суд 1 во Скопје за ослободување на Красниќи и осуммина други инволвирани во случајот од обвинението, како и дека се применети „различни аршини при проценка на исти докази“.
 

08.03.2007 Владата генерално ги почитува човековите права на своите граѓани, сепак, во некои области постојат проблеми. Полициското малтретирање осомничени лица и натаму претставува проблем, а има и тврдења за полициско вознемирување на етничките малцинства, особено на припадниците на ромската заедница, вели американскиот Стејт департмент во делот за Македонија во својот извештај за состојбата на човековите права во 2006.

Корупцијата и политичкиот притисок во министерствата за внатрешни работи и за правда, судовите и Канцеларијата на јавниот обвинител ја спречија истрагата за некои тврдења за злоупотреба на човековите права и процесот на изведување пред суд на обвинетите. Земјата и натаму е транзитна и дестинација за жртвите на трговија со луѓе, за сексуално искористување и работа. Општествената дискриминација кон етничките малцинства, особено Ромите, и натаму претставува проблем, се вели во извештајот.